67 950 гадзін у дапамогу дзецям: падведзены вынікі дабрачыннай акцыі «100 гадзін з А1: Падтрымай TEAM BY!»
Дабрачынная ініцыятыва «100 гадзін з А1: Падтрымай TEAM BY!», ініцыятарамі правядзення якой сталі кампанія А1 і Нацыянальны алімпійскі камітэт Рэспублікі Беларусь, завяршылася. Яе ўдзельнікам удалося датэрмінова дасягнуць мэты ў 50 000 гадзін фізічнай актыўнасці, а на фінальным лічыльніку значыцца 67 950 гадзін. Па выніках акцыі Рэспубліканскаму клінічнаму цэнтру паліятыўнай медыцынскай дапамогі дзецям пералічана фінансавая дапамога ад А1 у памеры 50 тысяч рублёў.
Дабрачынная ініцыятыва аб'яднала больш за 15 тысяч жыхароў Беларусі, у тым ліку спартсменаў дзеючай нацыянальнай алімпійскай каманды. Сярод іх чэмпіёнка еўрапейскага першынства па плаванні 2019 года Анастасія Шкурдай, чэмпіён свету 2020 года ў веласпорце на трэку Яўген Каралёк, сярэбраны прызёр Кубка Еўропы 2019 года па спартыўнай хадзьбе Дзмітрый Дзюбін і чэмпіёнка еўрапейскага першынства 2018 года па марафоне Вольга Мазуронак, якія сталі амбасадорамі «100 гадзін з А1: Падтрымай TEAM BY!». Акцыю падтрымалі і іншыя знакамітыя спартсмены: Віталь Парахонька, Крысціна Ціманоўская, Эльвіра Герман, Дар'я Барысевіч і паралімпійская чэмпіёнка Людміла Ваўчок, а таксама футбольныя клубы БАТЭ і «А1 Юніёр», Беларуская федэрацыя плавання, Нацыянальны алімпійскі стадыён «Дынама» і многія іншыя.
«Мы шчыра дзякуем усім удзельнікам і арганізатарам ініцыятывы «100 гадзін з А1: Падтрымай TEAM BY!». Наш калектыў вельмі ўдзячны за тое, што на заклік аб дапамозе адгукнулася такая вялізная колькасць жыхароў нашай краіны, за ўвагу да працы нашага цэнтра і да нашых пацыентаў. Мы рады, што сваім удзелам у акцыі людзі дапамагаюць нашым дзецям, клапоцячыся пра сваё здароўе. Атрыманыя сродкі мы накіруем на закупку абсталявання, неабходнага для аказання паліятыўнай дапамогі нашым маленькім пацыентам», – пракаментавала дырэктар Рэспубліканскага клінічнага цэнтра паліятыўнай медыцынскай дапамогі дзецям Людміла Бомберава.
Па ўмовах акцыі «100 гадзін з А1: Падтрымай TEAM BY!» усе ахвотныя маглі зарэгістравацца на сайце праекта і фіксаваць свае дасягненні ў занятках любым з чатырох відаў індывідуальнай фізічнай актыўнасці: бегу, плаванні, хадзьбе або яздзе на веласіпедзе. Асабістай мэтай кожнага ўдзельніка былі 100 гадзін трэніровак за 50 дзён, а сумеснымі намаганнямі ўсім удзельнікам неабходна было дасягнуць лічбы ў 50 тысяч гадзін. З гэтай задачай яны справіліся датэрмінова: лічыльнік праекта паказаў патрэбны вынік ужо на 38-ы дзень. Аднак на працягу ўсяго астатняга часу ўдзельнікі мелі магчымасць паляпшаць свае персанальныя дасягненні і змагацца за перамогу як у агульным заліку, так і ў кожнай з чатырох галоўных дысцыплін. Вынікам акцыі сталі 67 950 гадзін фізічнай актыўнасці.
У афіцыйным спартыўным заліку зарэгістраваных удзельнікаў дабрачыннай акцыі «100 гадзін з А1: Падтрымай TEAM BY!» – 1427 чалавек, а ўсяго ў мерапрыемствах акцыі ўзялі ўдзел больш за 15 000 чалавек. На працягу 50 дзён акцыі – з 23 чэрвеня па 11 жніўня 2020 года – праходзілі спартыўныя мерапрыемствы па ўсіх чатырох асноўных дысцыплінах: «Дзень хадзьбы», «Плавальны ўікэнд», чэлендж «Веладапамога дзецям» і «Бегавы тыдзень». У гэтыя дні зарэгістраваныя ўдзельнікамі вынікі трэніровак у названых відах фізічнай актыўнасці падвойваліся або патройваліся.
Абсалютным чэмпіёнам дабрачыннай акцыі «100 гадзін з А1: Падтрымай TEAM BY!», які набраў найбольшую колькасць гадзін фізічнай актыўнасці, стаў Уладзімір Губіч з горада Ветка (Гомельская вобласць). Яго сукупны вынік склаў 1671 гадзіну, а стратэгія поспеху ўключала як актыўны ўдзел у спартыўных мерапрыемствах, так і бонусныя гадзіны за запрашэнне новых удзельнікаў дабрачыннай ініцыятывы.
Акрамя таго, узнагароды па выніках праекта ў асобных відах спорту атрымалі:
Бег | Плаванне | Хада | Веласіпед |
|---|---|---|---|
Міхаіл Фітковіч 494,8 г. | Вераніка Маісеева 141 г. | Сяргей Спаднікайла 682,3 г. | Кацярына Страковіч 634 г. |
Юрый Шаўцоў 295,5 г. | Уладзімір Губіч 141 г. | Алег Гайдук 599,5 г. | Наталля Каралёва 355,3 г. |
Наталля Лаўрэнава 262 г. | Аляксандр Зімніцкі 79,3 г. | Таццяна Міхайлава 417 г. | Кацярына Прылуцкая 285,5 г. |
Свой унёсак у ініцыятыву зрабілі тысячы жыхароў нашай краіны – ад наведвальнікаў фітнес-клубаў і трэнажорных залаў, якія папоўнілі скарбонку акцыі гадзінамі заняткаў і фізічнай актыўнасці, да вядомых спартсменаў і найлепшых беларускіх каманд. Да акцыі далучыліся плавальныя клубы «Алімпіец» (Мінск), «Фінвал» (Мінск), «Аквастарс» (Брэст), «Жоўтая субмарына» (Гомель), «Спартыўны клуб «Белы Мядзведзь» (Полацк), «SWIMMINSK» (Мінск), сталічныя фітнес-клубы «Аргумент», «Свет фітнэсу», «Лайфстайл», «Аквамарын», бегавыя клубы DMRUNNING (Гомель), Dovydko Running Club (Мінск), а таксама RUN4FUN, які мае аддзяленні ў Пінску, Гродне, Століне, Магілёве, Баранавічах, Брэсце і Мінску.